Óskað var eftir aðstoð björgunarskipsins Þórs í Vestmannaeyjum í gærkvöld þegar koma þurfti sjúklingi upp á land. Þoka í Eyjum kom í veg fyrir að þyrla Landhelgisgæslunnar gæti lent og því var ákveðið að fara sjóleiðina.Vakthafandi læknir hafði samband við Björgunarfélag Vestmannaeyja í gærkvöld og bað um aðstoð við að koma sjúklingi hluta leiðarinnar til Reykjavíkur. Áhöfn björgunarskipsins Þórs var kölluð út á hæsta forgangi og hálftíma eftir að beiðni um aðstoð barst var sjúklingurinn kominn í Landeyjahöfn. Þaðan var hann fluttur með sjúkrabíl til Reykjavíkur.Greint er frá þessu á Facebook-síðu björgunarfélagsins. Þar er áhöfninni þakkað fyrir skjót viðbrögð og sjúklingnum óskað skjóts og góðs bata.
