Skemmdarverk voru unnin á rafmagnslínum nærri orkuveri í Jaenschwalde í Þýskalandi í dag. Ein sprengja sprakk og aðrar fundust ósprungnar á vettvangi. Nokkrar truflanir urðu á rafmagnsdreifingu en sprengingin hafði ekki mikil áhrif. Allar rafmagnslínurnar eru komnar í fulla notkun á ný samkvæmt tilkynningu frá orkuverinu. LEAG sem rekur orkuverið sagði í tilkynningu að ráðist hefði verið á starfsemi fyrirtækisins í Preilack. Rafmagnið sem er framleitt í Jaenschwalde fer í gegnum stöðina í Preilack.
