Franski sjóðastýringarisinn Ardian hyggst fjárfesta fyrir meira en þrjá milljarða evra í gagnaverum og stafrænni innviðauppbyggingu á Norðurlöndum á næstu árum, en undir merkjum Verne Global stendur félagið nú meðal annars að stórum fjárfestingum í gagnaveri sínu á Íslandi. Fjárfestingafélagið veðjar á að samkeppnishæf endurnýjanleg orka, nægt landrými og náttúruleg kæling á Norðurlöndum muni gegna lykilhlutverki til að mæta sívaxandi orkuþörf gervigreindar.
