„Hann hefur klárað nokkrum sinnum svona í Fífunni, skotið nokkrum sinnum á markið þar," segir fyrrum landsliðsmarkvörðurinn Gunnleifur Gunnleifsson um mark sonar síns gegn KA á sunnudagskvöld. Arnar Bjarki Gunnleifsson, sem verður ekki 16 ára fyrr en seinna á þessu ári, skoraði sitt fyrsta mark í Bestu deildinni gegn KA. Hann innsiglaði sigur Breiðabliks með þriðja marki liðsins í fyrsta byrjunarliðsleik sínum fyrir Breiðablik. „Hann hefur lagt sig gríðarlega mikið fram í vetur. Hann á framtíðina fyrir sér og ég er þakklátur fyrir hans hönd að hann sé að uppskera," sagði þjálfarinn hans, Ólafur Ingi Skúlason, við Fótbolta.net eftir leikinn.
