Unnsteinn Manuel sendi póstkort í Poppland og sagði frá laginu Bergnuminn, úr leiksýningunni Gæðablóð sem Unnsteinn sýnir um þessar mundir.„Í sýningunni er atriði þar sem ég syng í gospelmessu í Malaví og mig vantaði lag sem væri ekki of trúarlegt á þessum stað í sýningunni,“ segir Unnsteinn. „Á sama tíma og við erum að æfa verkið þá missi ég pabba minn úr krabbameini. Það hafði auðvitað þvílík áhrif á lagið og ekki síst spurningarnar sem kviknuðu hjá syni mínum í kjölfarið þegar hann syrgir afa sinn.“„Ég er afskaplega stoltur af því hvernig lagið tókst til og syng það til föður míns á hverri sýningu. Það passar líka svo vel í þema verksins, hvaðan komum við, hver er uppruni okkar, hvert stefnum við og hvernig viljum við að börnin okkar hugsi til okkar þegar við föllum frá?“
