Kristinn Jón Ólafsson, varaborgarfulltrúi Pírata, gefur kost á sér í fyrsta sætið á framboðslista flokksins fyrir borgarstjórnarkosningar í vor. Alexandra Briem borgarfulltrúi hefur einnig gefið kost á sér í fyrsta sætið. Oddviti flokksins í síðustu kosningum, Dóra Björt Guðjónsdóttir, gekk til liðs við Samfylkinguna fyrr á þessu ári.Kristinn segist vilja leiða borgina inn í mannvæna, græna og örugga framtíð sem byggi á gagnadrifnum ákvörðunum og framúrskarandi þjónustu við íbúa. Hann vill hlúa að frelsi barnanna í borginni með vistvænum samgöngum, fjölbreyttum frístundum og aðgengilegum grænum leiksvæðum. Prófkjör Pírata fer fram á vef flokksins og verður opið fyrir kosningu frá 26. febrúar til 6. mars.
