„Þetta var svolítið sterkt moment af því að ég er bara unglingskrakki þarna, og ég fann að þetta væri ekki eðlilegt. Á þessum tíma, árið 1975, þá voru svona mál ekkert uppi á yfirborðinu,“ segir Elín Hirst fjölmiðlakona um augnablik þegar hún sem ung stúlka varð vitni að óviðeigandi framkomu Ólafs Skúlasonar, biskups Íslands, gagnvart móður hennar. Hún segist í starfi sínu sem fréttastjóri Stöðvar 2 á sínum tíma hafa fundið vel fyrir því hversu mikil ítök biskupinn hafði í samfélaginu.
