Hálfleikssýning Grammy-verðlaunahafans og einnar frægustu poppstjörnu heims um þessar mundir, Bad Bunny frá Púertó Ríkó, á Ofurskálinni í nótt skipti fólki í fylkingar. Þótt sýningin hafi trekkt að tugmilljónaáhorf skiptu einhverjir um rás og fylgdust í staðinn með hálfleikssýningu Kid Rock í boði Turning Point USA, samtaka Charlies heitins Kirks.Bad Bunny hefur neitað að enskuvæða tónlist sína og söng á spænsku í nótt. Ingunn Lára Kristjánsdóttir samfélagsmiðlafréttamaður bendir á að hátt í 45 milljónir Bandaríkjamanna tali spænsku á heimilum sínum.„Þetta er alveg hátt í 13% Bandaríkjamanna og í rauninni í fyrsta sinn í Ofurskálinni sem þeir sjá risasýningu einungis á spænsku,“ segir Ingunn Lára. „Þau hljóta að hafa fagnað því og líka að fá að sjá þessar táknmyndir rómönsku Ameríku.“
